Grafica Piano Mobilità Provinciale 2030

2030 südtirolmobil: Program por le dagní

Intervënc y proiec por la mobilité publica tl Südtirol

Ecologich, smart y saurí da d'adoré - la mobilité publica s'orientëia a chisc prinzips. I intervënc y proiec che é concretamënter sön le program por i proscimi diesc agn vëgn cumpedá sö dal assessur por la mobilité Daniel Alfreider sön na plata web aposta.

Le Südtirol fej investimënc por le dagní dl trasport local - insciö dij le titul. Al pröm post él l'adoranza de veicui zënza emisciuns, le svilup sostenibl dl'"ultima milia", la digitalisaziun y ince n'oferta iüsta por i anuzadus y les aziëndes de trasport tl respet di criters d'assegnaziun dl'UE.

La basa de programaziun por chësc é le plan dla mobilité provinzial olache al vëgn metü jö por scrit i fins strategics y i criters de cualité por le trasport de porsones publich y les rëis de infrastrotöres che é debojëgn.

Les tapes plü importantes cina le 2025 é bele gnüdes definides: le completamënt di zëntri dla mobilité de Sigmundskron, Bornech y Porsenú, la metüda en funziun dla linia dla ferata eletrificada dla Val Venosta, n ticketing mobil, le plan de mobilité por les rodes cun lapró la metüda a desposiziun de box por les rodes, l'acuisiziun de ferates surapró y de bus ecologics cun na plataforma d’entrada bassa, n sistem de ticketing nü, n'informaziun di orars online suraregionala y i.i. Sambëgn dessel ince gní porté a conclujiun i gragn proiec sciöche la varianta dl Riggertal coche coliamënt ascorté dla linia dla ferata de Puster ala ferata dl Prener y ince le tunel dla ferata nü sot al Virgl a Balsan.

Sön le program cina la 2030 él spo ciamó la reelaboraziun dl plan dla mobilité provinzial, le zënter dla mobilité de Sanciana, i pröms proiec che reverda le trasport autonom y le baraté fora inant i bus cun bus da motors a traziun eletrica, ince cun l'adoranza dla teconlogia a idrogen. L'obietif é bëgn tler: le bus, la ferata y la roda dess ester elemënc-tle por la mobilité dl dagní por mantigní bun nosc ambiënt y garantí dîalalungia nosta cualité dla vita.

Dá na odlada: Düc i proiec, i dac atuai y le link al plan dla mobilité provinzial é da ciafé

chiló

Giapé nutizies-push

Giapa nfurmazions sun ti fermedes y linies. Chësta mpustazion possa unì deativeda te uni mumënt tres l browser.