Una persona che guida la macchina

Contribut dles spëises de iade por pendolars y pendolares

Al é poscibl da fá la domanda online cina ai 31 de merz

Che che n'á degun coliamënt cun le bus o la ferata da jí a lauré o á ma coliamënc nia da se fá saurí, pó damané l'aministraziun provinziala do n contribut por les spëises de iade.

Da atira inant y cina ai 31 de merz pó i dependënc y les dependëntes dla Provinzia ti presenté al Ofize aministratif Mobilité les domandes online de contribut por les spëises de iade por l'ann 2022. Chësc pó gní fat cun l'azes digital SPID o cun la Cherta d'identité eletronica (CIE) y ince cun la cherta di sorvisc ativada.

Na majera avalianza dles oportunités tla lita dl post de laur

Le pice contribut de spëises é ponsé por dötes chës porsones che mëss jí vigni de ia y ca por laur o che ne pó nia s'anuzé di mesi publics porvia dl orar de laur o dla trassa, o se fej ert da s'un anuzé y é porchël sforzades da tó so auto. Dantadöt por che che ti vá do a n'ativité profescionala che vëgn da raiuns rurai o desman y ince por che che á turnus de laur é le contribut por spëises de iade n sostëgn finanziar y porta pro a na majera avalianza de oportunités tla lita dl post de laur, dij l'assessur por la mobilité Daniel Alfreider.

En l'ann passé él gnü mené ite 5000 domandes de contribut por les spëises de iade; la Provinzia â metü a desposiziun incër trëi miliuns de euro. Le contribut mesan a porsona é sté de incër 610 euro.

Condiziuns por ciafé le contribut: trasses plü lunges y tëmps d'aspeta

Le personal dependënt che mëss se sposté por almanco 120 dis al ann por plü co 18 chilometri al iade danter le post d'abitaziun y le post de laur, y plü avisa sön na trassa olache la n'é degügn sorvisc de linia che vá almanco vigni mesora á le dërt da ciafé le contribut por spëises de iade. Al röia ciamó lapró d'atri criters, danter chisc mësson ester plü co 10 chilometri dainciará dala proscima architada, i orars de laur ne pó nia jí a öna cun chi dl bus o dla ferata y i tëmps d'aspeta mëss ester lunc.

Le contribut ne vëgn nia conzedü sce le davagn brutto vá sura i 50.000 euro o sce an s'anüza de n meso de sorvisc debann. Implü ne vëgnel nia conzedü contribuc sot a 200 euro.

Dötes les informaziuns y i recuisic detaiá por podëi presenté domanda de contribut por les spëises de iade é da ciafé sot a chësc link

Giapé nutizies-push

Giapa nfurmazions sun ti fermedes y linies. Chësta mpustazion possa unì deativeda te uni mumënt tres l browser.