Orario

Dai 13 de dezëmber orares dla curieres y dla ferates nueves

I cunliamënc dla curieres vën ampliei te duta la provinzia

Cunliamënc dla curiera n plu da sëira, daduman y n i fins dl’ena, cunzec per la curieres te truep luesc  y n pitl plus per i cunliamënc dla ferates – chisc ie i elemënc plu mpurtanc dl orar nuef per l 2021, che jirà n forza n la segonda dumënia de dezëmber y che miurerà inò de truep la mubilità publica tl Südtirol.

Bulsan y ntëurvia – Überetsch –Val dl Adesc Bassa

De plu mudazions y n pert nce trasses nueves  iel pra i Citybus a Kaltern y Eppan, per ejëmpl per Oberplanitzing, Altenburg y Girlan. Na nuvità ie la linia nueva da sëira 136 Bulsan – Kaltern – Tramin. Definedes a na maniera plu tlera y plu spësses ie la linies dla curieres tl Sarntal, tla Val d’Ega, per l raion Salten / Tschögglberg y Renon. Per acuntenté la dumanda possen śën per l prim iede nce arjonjer Jochgrimm cun i mesuns publics y chël cun la linia 184 Weißenstein / Jochgrimm – Obereggen – Birchabruck.

Viages n plu daduman y da sëira àn nce njinià ite pra de plu linies de zità dla Sasa. A Bulsan vën la linia 18 ntegreda tla linia 111. La linia 201 Maran – Bulsan vën śën ënghe amplieda ala dumënies y ai dis de festa a na moda da arjonjer n ritm de viages d’uni mes’ëura.

Val Venuesta, Maran y ntëurvia

La ufierta dla curieres vën amplieda te truep luesc, dantaldut da sëira y daduman. Chësc reverda danter l auter i raions de Ulten y dla Val de Non auta coche nce la trassa Verdins – Schenna – Maran. I/La viagiadëures puderà nce se nuzé dla linia de zità nueva 5 dla Sasa dala stazion de Maran tres la zona artejanela de Untermais ala stazion de Untermais, dla linia nueva 217 da Forst a Maran, de na linia 212 strutureda a na maniera nueva danter Marling y Maran y nia per ultim de na fermeda n plu a Bulsan sud dla ferata per penduleres che pëia via da Maran dala 6.54.

Pra la ferata dla Val Venuesta unirà la partënzes abenëura daduman metudes n valgun menuc dant sun l orar y la ferates express vën pitedes per dut l ann nce n la dumënies y n i dis de festa.

Val d’Isarch / Val d’Isarch auta y Puster

Tla valeda dl Isarch iel dantaldut truep traverc de jites che giapa cunliamënc de curiera nueves, danter chisc i raions de Ratschings, Funes, Tschötsch, Mont de Villanders, l plateau aut de Natz-Schabs, mé per nen nunzië n valguni. Nce te Gherdëina iel unì putenzià i orars locai. A vantaje di penduleres ti va nce l cunliamënt n plu dla ferata Bulsan – Prëner dala 16.28.

Valdaora giapa n cunzet per l Citybus nuef cun doi curieres che va dut l ann nce n la dumënies y n i dis de festa. N’autra ufierta iel d’inviern per l Citybus Burnech 1 y sun la mont de Rodeneck. Ampliei dassënn vën oradechël nce i cunliamënc dla curieres a Rein y Ahornach coche nce a Antermëia, Lungiarü y La Val. La trassa Rina – Longega giapa cun la linia 467 n orar nuef.

Giapé nutizies-push

Giapa nfurmazions sun ti fermedes y linies. Chësta mpustazion possa unì deativeda te uni mumënt tres l browser.