Plü trasparënza por ci che reverda i prisc dles chertes, n sostëgn miré por les porsones cun handicap, plü lerch por les rodes y n sistem d'adoranza unitar por la retüda di cosć de iade canche al é de gran intardiades - a chësta moda dess le jí cun la ferata gní ciamó plü atratif te döta l'Europa.
Bele dl 2017 â la Comisciun Europeica sburlé che al gniss atualisé i dërc di passajiers dla ferata a livel europeich. Do da tratatives de mëisc s'é le Parlamënt europeich gnü sön na ligna de mosöres por fá gní la ferata ciamó plü atrativa tl'UE, promöie la concorënza te chësc setur y fá gní insciö döta la mobilité plü ecosostenibla.
Chësta ediziun nöia di dërc di passajiers vëiga danterater danfora na miú comparabilité di prisc dles chertes. Tres mascins de chirida nöies dess la clientela rové plü saurí pro les mius chertes de iade, sciöche al é porater bele pro le trafich di fligri. Por realisé chësc mëssel gní metü a desposiziun düc i dac da pert dles impreses dla ferata. Na novité é ince le sorvisc d'aiüt por passajiers y passajieres dla ferata canche al é de gran intardiades o al toma fora na ferata y na regolamentaziun unitara por la retüda dl prisc de iade ti caji de de gragn intardiamënc. N'atenziun particolara ti vëgn dada ales porsones cun handicap y ala realisaziun de posć aposta por les rodes tles ferates. I dërc di passajiers nüs dess valëi tl dagní ince por le trafich regional y é n vare important devers de na regolamentaziun unitara dl trafich dles ferates tl'Europa.
Chësc documënt provisore passa sëgn fora por les atres istanzes dl'UE y jará en forza 24 mëisc do la publicaziun tla Gasëta Ofiziala dl'UE.