Che che cumpra proscimamënter na cherta de iade singola, na cherta valur, la cherta de n de Euregio 2 Plus o na cherta de n de por se tó para la roda ciafará tles mans na cherta da n stil nü: ara é blancia y börna cun n design südtirolmobil tler. Insciö s'adatëia sëgn ince chëstes chertes de iade ala comparida nöia unitara dla mobilité publica tl Südtirol.
I orars regolars di mesi de trasport publich dl Südtirol, la ferata dl Südtirol, le Südtirol Pass - chisc é stá ti ultimi agn les gran peres miliares tl trasport local publich. La marca "M - südtirolmobil" rapresentëia sëgn la dimenjiun nöia: sciöche denominadú deboriada y sciöche tët deboriada por la mobilité publica tl Südtirol sciöche ince por les ofertes y i sorvisc ecologics coliá. La marca é dla Provinzia de Balsan y vëgn aministrada da süa sozieté inhouse STA - Strotöres Trasport dl Südtirol Spa. "M - südtirolmobil" sostituësc danterater la denominaziun da denant "Trasport integré Südtirol" y le design nü vëgn sëgn destenü fora te döta la mobilité publica dla provinzia.
Bus, ferates, automac, orars ince dötes les sorts de stampes y publicaziuns ciafará vare por vare le logo nü. Zacotan de chertes de iade, danter chëstes ince le Südtirol Pass, l'abo+ y les mobilcards zircolëia bele da n pez te chësta iesta nöia. Sëgn ti tochera ales proscimes. Al é zënzater da conscidré che tl Südtirol vëgnel adoré almanco 3 miliuns de chëstes chertes al ann. Chertes de iade singoles, chertes valur, chertes de n de por se tó para la roda, chertes por i bus de cité y mobilcards fora di automac ne sará tl dagní nia plü ti corusc grisc y blanch cun le logo dl Trasport integré da n iade, mo ares sará blances y börnes cun na "M" stilisada por cuntrassegné la mobilité publica tl Südtirol.
Intant se tratera ciamó tres de chertes de iade cun strisciores magnetiches. Ti proscimi agn dessel gní porté ite tres plü y plü sistems contactless y ince modalités de convalidaziun flessibles.