Por gauja de de gragn laurs de costruziun y manutenziun sarál ti proscims dis de majeres interuziuns pro le trafich dla ferata.
Le toch Sanciana - Bornech resta daldöt stlüt da en sabeda, ai 30 d'otober cina en sabeda, ai 6 de novëmber; al vëgn metü sö n sorvisc sostitutif dla ferata cun le bus. Por rajuns aziendales tomel implü ince fora n valgönes ferates tl toch Bornech - Franzensfeste; ince chëstes gnará sostituides dal bus. Ti bus sostitutifs ne sarál nia poscibl da trasporté rodes.
Roda nöia por le sorvisc sostitutif dla ferata: A Bornech s'archita i bus sostitutifs ma pro la staziun da Bornech (Via Marconi) y pro l'architada dl Parch Tschurtschenthaler. La roda condüj tres la strada da Raiscia y la sortida nöia de Bornech zënter. Insciö dessera jí da ascorté n pü' i tëmps de iade y garantí i coliamënc cun la ferata.
La rajun por chëra che le toch vëgn stlüt por de plü dis é che al vëgn fat laurs preliminars por realisé n punt nü dlungia Valdaora, che gnará rové en ater ann. Por smendrí plü che ara vá i problems por les porsones che vá cun la ferata él propi gnü chirí fora la pröma edema de novëmber por fá i laurs, deache dailó n'él nia scora.
En domënia danmisdé: döta la linia dla ferata de Puster stlüta
En domënia, ai 31 d'otober danmisdé, vëgnel fat sön la linia dla ferata de Puster i laurs de control y manutenziun ordinars che l'aziënda competënta por la rëi dla ferata inviëia ia te intervai de tëmp regolars. Döta la linia dla ferata danter Sanciana y Franzensfeste resta porchël stlüta dales 6:30 ales 13.30. Sciöche dagnora vëgnel metü a jí n sorvisc sostitutif dla ferata cun le bus.
Sorvisc sostitutif dla ferata de Puster
En domënia che vëgn sarál n'interuziun dales 9.00 ales 12.00 tl toch Sanciana -Sillian. Plü dis stlüt sará le toch danter Sanciana y Lienz, bonamënter danter i 7 y i 15 de novëmber, deache al vëgn metü jö binars nüs tla staziun de Thal tl Tirol dl Ost.