I abonamënc anuai por le trasport publich „Südtirol Pass abo+“, che vá debojëgn por le proscim ann de scora o stüde, dess gní arlungiá o damaná do adora assá. A na moda che la tarifa anuala por i abo+ sides tl dagní da scrí jö dales cutes ves aconsiunse da ne paié nia en contanc la soma, mo tres cun le bancomat, la cherta de credit / pagoPA (l possa unì a se l dé spëises), le home-banking o le paiamënt bancar (SEPA Direct Debit), a na moda che ara vais da ti jí do al paiamënt.
Aladô dl'esperiënza fata ti atri agn él al scomenciamënt dl ann de scora cotan da fá por ajorné feter 80.000 abo+ y al vëgn dër tröpes porsones ti ofizi y tles sëntes de venüda y ince le Call Center á bindebó tröp da fá. Porchël ti vëgnel aconsié ales families da fá domanda adora assá. I abo+ da sëgn vel ciamó cina ai 15 de setëmber dl 2020 y sce an i arlungëia online y paia la tarifa anuala veli ciamó n ann. I abo+, che vëgn sëgn damaná do por le pröm iade, pón jí a do dal 1. de setëmber dl 2020 te scora y pó gní adorá do avëi paié le cost anual.
L'arlungiamënt anual di abo+ y ince les domandes nöies pó ma gní fates online sön la plata web. Al ne vá nia debojëgn de n azes digital, chël ó dí dl SPID o dla cherta di sorvisc ativada y le letur.
Pro mitans y mituns sot i 18 agn mëss la domada online dl Südtirol Pass abo+ o so arlungiamënt gní fac dai geniturs o dala porsona responsabla dl'educauziun don dant i dac personai y le codesc fiscal. Les jones y i jogn che á cumplí i 18 agn mëss instësc fá domanda de arlungiamënt don dant so inom y ciarié sö i documënc che vá debojëgn (copia dla cherta d'identité) o i ortié tres e-mail.