Puster: NonStop
La varianta dl Riggertal coliará la linia dla ferata dl Prener cun la linia dla ferata de Puster zënza deviaziuns. Por la jënt che vá cun la ferata ó chësc dí dantadöt se sparagné 15 menüc de iade da jí cun la ferata da Balsan a Bornech.
Cun na lunghëza de 3,8 chilometri, n punt de zirca 190 metri y n tunel de zirca 800 metri, é la varianta dl Riggertal un di proiec dla ferata plü importanc di proscimi agn y forma la basa por na mobilité sostignibla y efiziënta te Puster.
Le gestur dla rëi dla ferata RFI s'anüza dl tëmp de stlüta por fá ince laurs tecnics y de segurëza sön la linia dla ferata che é bele tla Bassa Val de Puster.
Situaziun atuala di laurs
I laurs de costruziun dla varianta dl Riggertal vá tresfora inant debota. A per dla linia dla ferata de Puster vëgnel realisé al momënt n proiet infrastrotoral al'avangarda te dër de ries condiziuns. Tuní desvalis cun lapró le sotpassaje dl'autostrada A22, che é dër impegnatif dal punt d'odüda tecnich, y le punt nü dl Riggertal vëgn realisá cun na grandiscima prezijiun.
Dai 27 de jená incá é la linia dla ferata indô daverta y ara romagnará en funziun cina al completamënt dla varianta dl Riggertal. Chësc garantiará tresfora le coliamënt tratan la fasa de costruziun suandënta.
Le proiet vëgn valorisé ciamó deplü dal’architada nöia de Schabs, che renforza la rëi dla ferata. Paralelamënter vëgnel bele tigní cunt di mioramënc tl dagní por ci che reverda le conzet dl orar: la mudaziun dl orar da sëgn prevëiga na palsa plü lungia a Bornech, che acompagnëia le passaje al conzet dl orar final dl 2027 y antizipëia le smendrimënt di tëmps de iade che se portará pro tl dagní tres la varianta dl Riggertal. Vare por vare ciaron da cherié n coliamënt dla ferata plü asvelt, plü efiziënt y colié ciamó miú por döt Puster.
Adorëise deplü informaziuns? Chëres ciafëise te nosta brosciüra!
Descarjëise adëssa la brosciüra!
Implü ciafëise ciamó d’atres informaziuns tla suravijiun te nosta seziun FAQs
Plü ferata, plü jënt te ferata
La linia nöia dla ferata de Puster, cun tëmps de iade cotan plü vantajusc, ti fajará tl dagní ciamó plü concorënza al auto privat. L'obietif é chël da baié sö plü pendolars y pendolares che ara vá da tó la ferata impede l’auto da jí danter Balsan y Bornech.
Tl tact dl Südtirol
Adöm cun d'atri proiec dla ferata te d'atri raiuns dl Südtirol (eletrificaziun dla linia dla ferata dla Val Venosta, potenziamënt dla linia dla ferata da Maran, costruziun dl tunel dl Virgl a Balsan), vëgnel realisé les condiziuns por, a dí che an dij, le "Tact dl Südtirol", chël ó dí n plann cun orars regolars vigni mesora, olache i iadi vá ciamó miú a öna.
La varianta dl Riggertal
La pröma pert dla trassa nöia dla linia dla ferata de Puster é naota paralela al'autostrada dl Prener cina ala sortida de Porsenú Nord, sot chëra che al passa spo n tunel de 796 metri. Dedô vá la linia sura n punt nü de 189 metri sön l'Isarch. Denanco arjunje l’architada nöia de Natz-Schabs, se coliëia la linea nöia ala linia dla ferata che é bele de Franzensfeste-Sanciana.
Ince la staziun dla ferata de Porsenú vëgn modernisada. Sciöche punt d’incrujada da mudé sarál n plann de scines nü da cinch scines y cater plataformes danter 240 y 400 metri lunges, sciöche ince n azes zënza impedimënc. Le sotpassaje che é bele gnará adaté. Ince la daurida de n’architada dla ferata a Vahrn fej pert dl proiet complessif. Al momënt é süa realisaziun tla fasa de proietaziun y fej pert dla secunda fasa de costruziun.
Picia retrospetiva
Dl 2008 él gnü scrit fora n pröm concurs de idees. Cun la sotescriziun dl'acordanza a Roma ai 23 de dezëmber dl 2015 da pert de Provinzia, RFI, BBT SE y STA, él gnü metü a jí la proietaziun dla varianta dla linia dla ferata dl Riggertal. Le stüde de fatibilité y le proiet preliminar é gnüs laurá fora dala STA.
Dl 2018 ti á la STA ortié inant le proiet preliminar al gestur dla rëi dla ferata taliana RFI. La Provinzia autonoma de Balsan fej para tres na convenziun.
Le conzet dl plann dl orar nü valará canche ara jará da jí sön la varianta dl Riggertal, bonamënter a mez le 2027.
Da chël momënt inant, jará les ferates zënza interuziun y zënza messëi mudé, diretamënter danter Balsan/Porsenú y Bornech.
Insciö tomarál ince demez l’architada plü lungia a Bornech che vá sëgn debojëgn y i tëmps dl trafich dles ferates sará mius y al gnará garantí n sorvisc dla ferata plü diret, fluid y afidabl te döt Puster.
La varianta dl Riggertal é n proiet dla mobilité dla linia dla ferata de Puster fondamental por le dagní. La trassa nöia cun le tunel y le punt smendrësc cotan i tëmps de iade y miorëia le coliamënt de Puster ala rëi dla ferata interregionala. A chësta moda vëgn la ferata plü asvelta, afidabla y interessanta por pendolars y pendolares y che che la tol da fá iadi.
Dai 27 de jená dl 2026 incá vá indô la ferata sön la linia dla Bassa Val de Puster. Chësc é n ater vare important devers dl plann dl orar dejidré y al pëia ia la fasa 03 dl conzet dl plann dl orar (ciara imaja) nü.
Sön la trassa che é bele vá les ferates indô zënza interuziuns cina a Franzensfeste, olache an müda sön la linia dl Prener. Insciö é Puster indô colié ala rëi dla ferata regionala dl Südtirol.
Cun l’orar nü stá la ferata chita plü dî a Bornech. Chësc ogará da compensé l'orar canche al sará da passé al conzet de orar definitif 2027. La palsa plü lungia porta pro porchël a n orar stabil, afidabl y orienté al dagní.
Cun l'ativaziun tl dagní dla varianta dl Riggertal miorará le coliamënt dla ferata danter Balsan/Porsenú y Bornech a na moda permanënta y funzionala. Tres la varianta dl Riggertal rovará les ferates che vëgn da Balsan na cherdora denant a Bornech: nia plü vigni ora, sön l’ora y dala mesa, mo bele vigni ora da n chert passé y dai trëi cherc. Por arjigné ca le miú che ara vá chësc mioramënt, él bele gnü fat damperfora val' adatamënc al conzet dl orar: l’orar dl bus é gnü sincronisé cun chël dla ferata y i orars scolastics é gnüs adatá ala situaziun nöia.
Por chësc mudamënt á le sorvisc sostitutif sön strada davagné i menüc che vá debojëgn por mantigní la maiú pert di coliamënc tratan la stlüta dla ferata, conzedon insciö da pité n sorvisc stabil. A chësta moda él gnü cherié na basa sterscia por l'orar preodü tl dagní. Porchël él gnü mudé do le completamënt dl tunel dla linia dla ferata dla Koralm, ince l'orar dl Tirol dl Ost de n chert d'ora: i tëmps da Lienz ti corespogn porchël avisa ai orars nüs da rové y pié ia da Bornech.
Porimpó él intardiades por le completamënt dla varianta dl Riggertal porvia de condiziuns cheder esternes. Porchël vëgnel al momënt atué le proiet dl orar te condiziuns transitores.
Cina che l’infrastrotöra nöia ne funzionëia nia daldöt sparagnon ma tëmp cun la ferata che vá te Puster. Impormó canche la varianta dl Riggertal sará rovada sparagnarán ince tëmp sön la linia dl Prener. Le tëmp por mudé a Franzensfeste mëss porchël gní aspeté sön la trassa.
Altamo cina jügn dl 2026 messará che che vá inant cun la ferata aspeté plü dî tla staziun de Bornech.
Les mosöres tutes vëgn controlades tresfora y sce al vá debojëgn vëgneres miorades y adatades por pité bele sëgn le miú sorvisc che ara vá a che che s’anüza dla ferata.
Do na analisa menüda, é gnüda l’architada plü lungia planificada aposta a Bornech y nia a Fortëza.
Por la ferata de Puster é Bornech na staziun zentrala por pié ia y por rové adalerch, dantadöt por studënc y chi che vá a lauré. Statisticamënter, porchël, reverda le tëmp d’aspeta a Bornech n numer de passajiers de passa n terzo mënder co chël a Fortëza, che é pordërt na dërta staziun de passaje.
Implü pita la staziun de Bornech - por süa posiziun y süa infrastrotöra - plü comodité co la staziun de Fortëza, olache al n’é gnanca n bar. A Bornech á i passajiers la poscibilité da aspeté te ferata. A Fortëza no. Chësc é important dantadöt por i mëisc da d’invern. Y le tëmp d’aspeta a Fortëza foss ciamó plü lunch, deache al foss da mëte lapró ciamó i 7 menüc por la coincidënza dla ferata che vá a Balsan.
Sambëgn, la aspeta a Fortëza ess indere ince sües perts positives: al ne fossel praticamënter nia poscibl da jomé les ferates da o cuntra Balsan. Döt adöm y dantadöt por i mëisc da d’invern, conscidran dötes les zircostanzes y le numer di passajiers, é les rajuns da programé na fermada plü lungia naota a Bornech cotan plü stersces.
Tl prozes de planificaziun él gnü valuté ince la poscibilité da partí sö le tëmp da aspeté danter les staziuns de Franzensfeste y Bornech. Na te soluziun alisirass bonamënter n pü’ la situaziun di coliamënc a Franzensfeste y smendriss i tëmps d'aspeta a Bornech, mo ne pó nia gní realisada por rajuns operatives y infrastrotorales.
La linia dla ferata de Puster é na trassa dantadöt da öna na scina cun n numer limité de punc de incrujada. Cun ferates che passa vigni mesora é les incrujades dles ferates coordinades avisa cun chisc punc che é bele. Tla Bassa Val de Puster mëss les ferates che vëgn dales döes direziuns s'incunté feter contemporaneamënter a Mühlbach y Ehrenburg por podëi s’incrujé.
Cun na partiziun dl'architada prolungiada ne foss chësc nia poscibl.
A per dla linia dla ferata danter Franzensfeste y Bornech él gnü fat investimënc importanc por realisé n’infrastrotöra moderna y afidabla. Indöt él gnü renové 27 chilometri de linies dla condüta tl’aria, y sön de gragn toc dla trassa él gnü modernisé döt le sistem eletrich cun l’istalaziun de zirca 500 pa nüs, cabli nüs y elemënc de sostëgn nüs. Implü él gnü ativé danü la scina de prezedënza de Vandoies y le sotpassaje y i ascensurs é ince nüs.
A Mühlbach deperpo él gnü renové le secunda scina. A Franzensfeste, Perca y Valdaora él gnü fat de gragn laurs de metüda en segurëza dles tëmples y a Aicha él gnü isolé le tunel dl Ochsenbühel, che contribuësc a aumenté ince la segurëza sön la trassa. Te chëstes mosöres él gnü investí passa 10 miliuns de euro, n vare fondamental por garantí n sorvisc dla ferata stabil, sigü y orienté al dagní te Puster.
Für die Fahrgäste zeigen sich die Investitionen vor allem an den Bahnhöfen: Insgesamt wurden 13 Bahnhöfe generalsaniert und deutlich aufgewertet. Rund 1.200 Leuchtmittel wurden auf moderne LED-Beleuchtung umgestellt, 3.500 Laufmeter Gehsteigkanten und 7.000 Quadratmeter Gehsteigflächen erneuert. Zudem wurden 7.000 Laufmeter taktile Wege für Menschen mit Behinderung verlegt und 18 Aufzüge neu gebaut oder umfassend modernisiert. Gemeinsam mit den Gemeinden wurden auch Bahnhofsbereiche und Parkplätze verbessert. Mit Investitionen von über 7,5 Millionen Euro entstehen so barrierefreie, moderne und komfortable Bahnhöfe für den Alltag von Pendler, Schüler und Reisenden.
La trassa dla linia dla ferata danter Franzensfeste y Bornech romagn stlüta cina ai 26 de jená dl 2026 porvia di laurs infrastruturai. Dai 27 de jená dl 2026 inant jará indô la ferata sön chësta trassa, cun coliamënt diret ala ferata dl Prener a Franzensfeste.
Sön la trassa austriaca danter Sanciana y Lienz él preodü na stlüta plü lungia dai 5 ai 26 d'aurí dl 2026. En acordanza cun les ferates partner austriaches, gnará chësc tëmp anuzé da completé ince tl'Alta Val de Puster i laurs de echipamënt dla linia cun le sistem de segurëza europeich ETCS nü. Porchël gnará la linia dla ferata stlüta sön la trassa Bornech-Sanciana dai 30 de merz ai 29 d'aurí dl 2026.
Al é ince preodü finestres de manutenziun regolares programades damperfora val' domënies, cun tëmps de feter dui mëisc danterite. Chëstes vá debojëgn por la manutenziun ordinara y la segurëza operativa por n tëmp lunch dla linia. Por le coliamënt dla trassa che é bele ala varianta dl Riggertal nöia jarál bonamënter debojëgn ciamó de n'atra stlüta de val' dis. Le tëmp avisa gnará lascé alsavëi por tëmp y ora, pornanche al gnará definí les condiziuns cheder di tëmps.
Por le coliamënt dla trassa che é bele ala varianta dl Riggertal nöia jarál bonamënter debojëgn ciamó de n'atra stlüta de val' dis. Le tëmp avisa gnará lascé alsavëi por tëmp y ora, pornanche al gnará definí les condiziuns cheder di tëmps.
1. Punt sura le Riggertal
- lunghëza 189 metri
- 75 metri sura la valada
- pendënza mascima 29,5 por mile
2. Trassa nöia sot l‘autostrada A22
- 4 tunei nüs (le plü lunch é 796 metri lunch)
3. Architada nöia a Natz-Schabs
4. Linia esistënta dla Bassa Val de Puster
- laurs de modernisaziun, de segurëza y tecnics
- istalaziun dl sistem de control dles ferates ETCS
- sostituziun dla linia tl’aria
- recostituziun dl punt d'incrujada dlungia la staziun dla ferata de Vandoies
5. Punt de incrujada por mudé pro la staziun da Porsenú
- plann dles scines nü: 5 scines, 4 plataformes (da 240 a 400 metri de lunghëza)
- azesc zënza impedimënc
- sotpassaje nü y apassenamënt dl sotpassaje che é bele
