I marciá da Nadé dl Südtirol inviëia da ciutié ite te süa atmosfera d'advënt cialda y liciorënta, descurí idees por scincundes particolares y se gode momënc plajors de aurela cörta cun la familia o i compagns y les compagnes. Ciamó plü saurí se stán sce al n'é nia n gran stress da rové adalerch – y porchël öga dër le bus y la ferata.
Che che s'anüza de mesi dl trasport publich, se sparagna codes y da chirí gonot cun fadia na plaza da parché, y vá atira a ti ciaré al marcé da Nadé se ston saurí.
Do n iade cört cina iló vëgn che che vá a ti ciaré tut sö dai tofs dl advënt conesciüs di biscoti, dla canela y dles nagoles – y la ligrëza danfora crësc cun vigni vare.
Balsan: Colié bun y saurí da rové adalerch
Le marcé da Nadé de Balsan arjunjon saurí cun la ferata dal Prener o da Maran.
Les fins dl'edema d'advënt vëgn l'oferta dla ferata danter Verona y Balsan cinamai ampliada: Dala staziun condüj le toch nü da jí a pe diretamënter tl zënter dla cité, plëgn de sorpreses y de pici highlights.
Ince les linies dl bus de cité 3 y 5 é plü gonot sön le iade la sabeda y la domënia. Implü vá la linia dl bus 111 danter Balsan y Leifers domisdé de domënia y i santus – sambëgn aladô de n orar particolar.
Sce al mëss propi ester l'auto…
Che che vá cun l'auto, dess jí fora dala sortida dl'autostrada Balsan Süd y parché pro la fiera de Balsan. Da iló condüj les sabedes, sciöche ince les domënies y i santus, i shuttle debann vigni 8-12 menüc diretamënter te cité. Les partënzes é pro l'architada "Balsan Süd - Fiera“, plataforma C tla via Marco Polo.
Alternativamënter vál da dailó demez ince la ferata devers dl zënter.
Maran: Mobilité flessibla tratan le tëmp da Nadé
Ince tl raiun de Maran vára da rodé incërch saurí: N conzet dl trasport flessibl porta pro che al vëgnes ajunté pro na gran afluënza de vijitadus y vijitadësses spontaneamënter deplü iadi. A chësta moda romagn le iade dagnora comot y sigü.
Y ciamó n bun consëi por la sajun frëida
Dlungia i gragn marciá da Nadé paiel ince la mëia da jí a ti ciaré ai mëndri marciá te döta la provinzia; chiló ciafarëise na bela atmosfera y ai é perfec por dötes les porsones che ó descurí ciantuns particolars.
é n acompagnadú d'öga – por la planificaziun y l'orientamënt sön döta la rëi.