Le dovëi da se vistí la maschera ti mesi dl trasport publich toma al 1. d’otober. Mo le Coronavirus pón tres ciamó se taché.
Da d’aisciöda dl 2020 incá êl obligatore da se vistí la maschera tl bus y tla ferata y porchël messâra tres ester da tó ca por se sconé dal Coronavirus. Naota podôn ince tó i slaucs de peza, les mascheres de peza y les mascheres chirurgiches. L’imaja dl trasport publich é gnüda caraterisada tl pröm ann da lockdowns, mosöres de dejinfeziun rigoroses, entrades y sortides te bus y ferata despartides, lercs de proteziun sarades por sconé ciafers y ciaferies de bus. I orars é gnüs mudá tröc iadi por i adaté ai bojëgns che mudâ tresfora y al é gnü metü a desposiziun bus di scolars y dles scolares surapró. An messâ ti ester a na gran desfida organisativa.
Maschera-FFP2 da forá dl 2021
Porvia dl’ona de infeziun nöia d’invern dl 2020/2021 é les mosöres de segurëza deventades te döt le stat plü rigoroses, de forá dl 2021 él gnü metü sö l’oblianza da se vistí la FFP2 ti mesi dl trasport publich. L’invern dedô é spo sté tles ciafes dla varianta Omicron, che á fat salté sö le numer de infeziuns y s’á ghiré mosöres de segurëza ciamó plü rigoroses. Al scomenciamënt de jená dl 2022 él rové le Super Green Pass tla mobilité publica. Al podô ma s’anuzé di mesi che che â fat la variora cuntra le COVID19 o ê varí dala maratia.
Tl cheder di pröms lochernamënc él gnü tut jö d’aurí dl 2022 l’oblianza dl Green-Pass, mo l’oblianza da vistí la maschera FFP2 sön i mesi de trasport publich é romagnüda te döt le stat.
Sëgn él danz da mëte averda!
L’ordinamënt statal sön le dovëi da se vistí la maschera te bus y tla ferata toma y an ne vëgn nia plü straufá sce an ne se tëgn nia. Tan deplü: sëgn nen vára da desmostré che i surantolun nosta responsabilité. Ince sce i n’un bele assá de chësc tema, messunse tres ciamó mëte averda, dantadöt por se sconé y scone la jënt incër nos ia dal Coronavirus.