La tarifa anuala pó gní paiada insciö tratan che an comana la cherta online:

• tres ordin permanënt tla banca (SEPA Direct Debit);
• tratan che an fej domanda cun la cherta de credit (Visa / Mastercard) / pagoPA: al podess ester val' da paié);

Denanco adoré le U19 ne mëssel nia gní ativé, mo al mëss gní paié la tarifa.

Le U19 pó gní comané da che che:

• á n codesc fiscal talian varënt;
• n'á nia ciamó complí 19 agn canche an fej domanda;
• á la residënza te n stat comëmber dl'UE o tla Svizera o se tëgn sö regolarmënter tl Südtirol.

Por les porsones de mëndra eté mëss la domanda gní fata da n genitur o da n rapresentant legal tres so account tl portal de südtirolmobil. I jogn y les jones che á bele complí 18 agn pó instësc presenté domanda online.

Important: Na domanda online che é bele gnüda presentada ne pó nia plü gní anulada.

Denanco comané o renové le Pass U19 mëss l'anuzadëssa/l'anuzadú cherié n account online.

1. Sce os sciöche genitur o porsona che á la responsabilité da genitur ëis bele n account personal online podëise comané o arlungé le U19 por osc möt/osta möta diretamënter tres osc profil.
2. Sce i n'ëis nia ciamó n account messëise naota ves registré online sön le portal de südtirolmobil y spo podëise comané o arlungé le U19 por osc möt/osta möta.

Südtirol Pass Portal

I U19 comaná por le pröm iade vëgn dá fora:

• diretamënter tres le secretariat dles scores de setëmber;
• pro le post de venüda südtirolmobil olache an á aposté la cherta.

Le U19 vel n ann cina ai 15 de setëmber. Al pó ma gní arlungé online, paian la tarifa anuala corespognënta por l'ann de scora suandënt, denant che al tomes, dai 16 de jügn de vigni ann inant.

Le pröm iade che an le comana pó le Pass gní adoré, do che al é gnü paié, dal 1. de setëmber inant y vel spo cina ai 15 de setëmber dl ann do.

Vigni iade cun le bus y la ferata mëss gní registré fajon le check-in pro i aparac de convalidaziun bröms, scenó ne vel la cherta de iade nia. Por la convalidaziun tlechel da tigní pormez la cherta al sensur dl aparat.

Por i iadi cun la ferata: Sce an tol diretamënter la coinzidënza ne án nia bria da convalidé ciamó n iade le Pass tla staziun de mudada. I jogn y les jones cun n Pass U19 che é te na ferata regionala a süd de Trënt che vá devers de Balsan y á na cherta varënta por la trassa cina Trënt n'á nia bria da convalidé so abonamënt tla staziun de Trënt por podëi viagé inant tl Südtirol.

Trassa dla ferata Desproch - Prener y Lienz - Sanciana: Bele tles staziuns de Desproch, Sillian y Lienz pón convalidé le Pass U19 che vel dala staziun de Prener o dala staziun de Sanciana. Por la trassa austriaca él da cumpré na cherta aposta.

Tl caje che an ess da se le perde, al se gniss arobé o an se rovinass le Pass U19 pól gní damané do n duplicat che costa 20 euro.

Sce le Pass n'á nia dagns da odëi, mo ne vá nia porvia de n defet o deache le material é danejé, pón damané debann do na cherta nöia pro i posć de venüda autorisá.

An pó damané do n duplicat pro i posć de venüda südtirolmobil autorisá.

Che che frecuentëia na scora fora dl Südtirol o i studënc y les studëntes universitars pó jí a se tó so dublicat dl U19 te n post de venüda autorisé.

Paiamënt dl duplicat: sce an paia tres SEPA Direct Debit vëgn i cosć por le dublicat metüs sön la proscima fatura.

Le U19 é n abonamënt personal nominal che mëss gní convalidé vigni iade che an tol n meso publich y al ne pó nia gní dé inant a d'atres porsones.
I jogn y les jones dai 14 agn insö mëss mostré sö, tl caje de control o sce le personal s'al damana, n documënt de identité varënt. Sce ara ne vá nia da mostré sö le U19 por ci rajun chessî (deache an se l'á desmentié o pordü) mëssel gní cumpré na cherta de iade varënta.
Sce le Pass U19 vëgn maladoré, vëgnel atira tut. L'ofize provinzial competënt determinëia por tan dî (da n mëis a alplü n ann). Te chësc tëmp ne pón nia damané do n U19 nü y gnanca do n duplicat.

Sön domanda pól gní ativé sön vigni U19 la funziun de sorvisc surapró a paiamënt o sciöche cherta prepaid da ciarié o postpaid cun detraziun direta dal cuntcorënt bancar. Insciö vára da paié:

• sce an ó se tó para la roda;
• sce an ó se tó para tiers;
• i iadi cun le Nightliner (inant ala tarifa por i Nightliner);
• Iadi cun les ferates regionales Prener - Desproch y Sanciana - Lienz: sön la trassa austriaca vëgnel apliché la tarifa VVT / ÖBB; che che á na cherta vantaji ÖBB (ÖBB-Vorteilscard) pó la registré sön so account online y s'anuzé insciö de na tarifa bunmarcé.

Convalidaziun: La convalidaziun dl U19 cun la funziun de sorvisc surapró a paiamënt vëgn adaldé tla medema manira co cun le südtirolmobil Flex Pass normal. Dantadöt por i iadi cun les ferates regionales él important canche an convalidëia da dé ite le codesc de destinaziun dla staziun de destinaziun y confermé la convalidaziun, scenó ne vel la cherta nia.

Südtirol Pass Portal