südtirolmubiltà U26 Pass
De bones pratiches: cun le bus y la ferata podëise jí indlunch
Le südtirolmubiltà U26 Pass é na cherta de iade eletronica personala por les porsones sot ai 26 agn. Al pó gní adoré zënza limic y te na manira flessibla sön döt le raiun dl trasport integré südtirolmubiltà, cun lapró les ferates regionales cina Trënt, paian na cuota fissa. L'U26 Pass pó gní damané da: che che á la residënza te n stat comëmber dl'Uniun europeica o tla Svizera o se tëgn sö de regola tla provinzia de Balsan, che che n'á nia ciamó complí 26 agn y damana le Pass cina le de dan so complí di 26 agn, che che á n codesc fiscal talian varënt.
Por i iadi sön les trasses dla ferata Prener - Desproch y Sanciana/Vierschach - Lienz, por le trasport de rodes o tiers y por i iadi cun i Nightliner vëgnel preodü cosć implü che n'é nia tl prisc anual. Cun chësta cherta ne pón nia s'anuzé dles ferates che vá lunc.
L'U26 mëss gní convalidé al scomenciamënt de vigni iade.
Recordesse: tl caje de n control sön le bus o la ferata n’él da mostré sö nia ma le Pass mo ince n documënt de identité. Ciarede dagnora da l'avëi para!
Al é da ciafé döes verjiuns dl U26 Pass:
- südtirolmubiltà Fix365 U26: Pass anual (365 dis dala data d'emisciun) al prisc de 150 euro;
- südtirolmubiltà Fix30 U26: abonamënt mensil (30 dis dal de dl'emisciun) che pó gní ativé online al prisc de 20 euro.
L'U26 á na validité de 30 o de 365 dis calendars y pó gní ativé o cumpré online canchessî. Al vel dal de dl'emisciun cina ales 23:59 dl ultimo de de validité.
I podëis damané l'U26 Pass online sön le portal südtirolmubiltà myportal.suedtirolmobil.
- Sce i ëis bele n account fajede le login cun osta e-mail y la password.
- Sce i ëis n account mo i ne s'ëis ciamó mai anuzé dl portal, fajede le pröm login cun le numer de osc Pass y osc codesc fiscal y metede ite i dac por osc profil.
- Sce i sëis n anuzadú nü o n'anuzadëssa nöia, messëise ma ves registré cun osta e-mail y üsc dac personai.
Vigni iade cun le bus y la ferata mëss gní registré cun n check-in tignin pormez le Pass al sensur dl aparat de convalidaziun. Sce i ne convalidëis nia, n'é osc Pass nia varënt.
Canche i fajëis n iade cun la ferata cun le Pass messëise ma le convalidé al scomenciamënt dl iade y nia vigni iade che i mudëis ferata; porchël sce i mudëis ferata tla medema staziun ne messëise nia convalidé ciamó n iade. Le medemo vel ince por che che á n U26 Pass y é sön na ferata regionala che vëgn da süd de Trënt cuntra Balsan cun na cherta varënta cina Trënt: a Trënt ne messëise nia gní fora dla ferata y jí a convalidé deache la cherta cür le iade cina dailó y da Trënt insö devers dl Südtirol vëgnel automaticamënter adoré le Pass.
Trassa dla ferata Desproch – Prener y Lienz – Sanciana: tles staziuns de Desproch, Sillian y Lienz él la poscibilité da convalidé le Pass che vel spo dales staziuns de Prener o de Sanciana. Por la trassa tl'Austria él da cumpré na cherta extra.
Sce i s'ëis pordü la cherta südtirolmubiltà, ara s'é gnüda arobada o ara é rovinada podëise damané do n duplicat por 20 euro.
Sce la cherta südtirolmubiltà n'á nia dagns che an vëiga mo ara ne vá nia porvia de n defet o de n dann material podëise damané che ara ves vëgnes stampada danü debann ti posć de venüda .
I podëise damané le duplicat (don dant olache i orëis jí a se le tó):
- tres l'account personal online;
- pro les portines dles chertes y pro i posć de venüda südtirolmubiltà autorisá.
Paiamënt dl duplicat: sce i paiëis tres SEPA Direct Debit, gnará i cosć por le duplicat metüs sön la proscima fatura.
I podëis ince paié le duplicat anter 15 de pro n post de venüda südtirolmubiltá, scenó ves gnarál bloché la cherta.
L’U26 é n abonamënt nominal y personal che an mëss convalidé vigni iade y che an ne pó nia dé inant a d'atres porsones. An mëss dagnora ince avëi para n documënt de indentité da ti mostré al personal tl caje de n control. Sce i ne ëis nia para l'U26 por ci rajun che mai (por ejëmpl deache i se l'ëis pordü o i ves l'ëis desmentié) messëise cumpré na cherta de iade varënta.
Tl caje de n'adoranza abusiva dl U26 ves gnarál tut atira. L'ofize provinzial competënt determinará por tan dî (da n mëis a alplü n ann). Tratan chësc tëmp ne podarëise no cumpré n U26 nü, no damané do n duplicat.